Google update: स्मार्टफोनवर कॉल करणं आणि रिसीव्ह करणं ही अगदी रोजची गोष्ट आहे. पण अलीकडे अनेक Android वापरकर्त्यांनी लक्षात घेतलं की, कॉल करताना किंवा कॉल येताना मोबाईलवर एकदम वेगळा स्क्रीन दिसतोय. हा बदल गुगलने आपल्या Phone App मध्ये आणलेल्या नव्या अपडेटमुळे झालेला आहे. या अपडेटनंतर कॉल स्क्रीनवर मोठी रंगीत बटणं, नवीन लेआउट आणि अधिक आकर्षक डिझाइन दिसायला लागलं आहे.
कॉल करताना आणि कॉल येताना काय बदल झालाय?
गुगलने या अपडेटमध्ये Material 3 Expressive Design वापरला आहे. त्यामुळे आता जेव्हा कॉल येतो किंवा आपण कॉल करतो, तेव्हा स्क्रीनवर आधीपेक्षा खूप मोठी बटणं दिसतात. कॉलरचं नाव आणि फोटोही मोठ्या आकारात दिसतो. इन-कॉल इंटरफेसमध्ये Answer, Decline आणि End Call सारखी बटणं आधीपेक्षा मोठी आणि चौकोनी वळणदार डिझाइनमध्ये बदलली आहेत. यामुळे संपूर्ण कॉल इंटरफेस पूर्णपणे नवीन वाटतो.
इनकमिंग कॉल जेस्चरमध्ये नवा पर्याय
या अपडेटमधील आणखी एक खास गोष्ट म्हणजे Incoming Call Gesture. आधी कॉल रिसीव्ह किंवा कट करण्यासाठी फक्त स्वाइप करावा लागायचा. आता मात्र सेटिंगमध्ये एक नवीन पर्याय दिला आहे. यात तुम्ही कॉल स्वाइप करून किंवा फक्त एका टॅपने रिसीव्ह/डिक्लाइन करू शकता. यामुळे चुकून कॉल कट होण्याची किंवा अनावधानाने कॉल रिसीव्ह होण्याची समस्या कमी होईल.
वापरकर्त्यांची प्रतिक्रिया
या नव्या डिझाइनबद्दल लोकांच्या प्रतिक्रिया वेगवेगळ्या आहेत. काहींना हा नवा इंटरफेस आकर्षक आणि सोयीस्कर वाटतो, पण अनेक वापरकर्त्यांना मोठी आणि ब्लॉकी बटणं आवडलेली नाहीत. काहींनी सोशल मीडियावर आपला नाराजी व्यक्त करताना सांगितलं की, आधीचा फोन अॅप अगदी परफेक्ट होता, पण आता तो गोंधळलेला आणि थोडा कुरूप दिसतो. त्यामुळे काहींना हा बदल उपयोगी वाटतोय तर काहींना अनावश्यक.
जुना इंटरफेस परत कसा आणायचा?
जर तुम्हाला हा नवा इंटरफेस आवडत नसेल आणि आधीसारखा साधा स्क्रीन वापरायचा असेल, तर त्यासाठी एक सोपा मार्ग आहे. Google Play Store मध्ये जाऊन Phone by Google हा अॅप शोधून त्याचे अपडेट्स Uninstall करा. यामुळे फक्त अपडेट हटेल, पण अॅप मोबाईलवर राहील. त्यानंतर मोबाईल रीस्टार्ट करा आणि Play Store मध्ये Auto-Update बंद करा. असं केल्याने पुन्हा पूर्वीसारखा पारंपरिक कॉल इंटरफेस दिसू लागेल.
निष्कर्ष: Google ने Phone App मध्ये Material 3 Expressive डिझाइन आणलं आहे, ज्यामुळे कॉल इंटरफेस पूर्णपणे बदलून गेला आहे. काहींना हा बदल नवा आणि आकर्षक वाटतोय, तर काहींना तो अजिबात आवडलेला नाही. मात्र हा अपडेट हळूहळू सर्व वापरकर्त्यांपर्यंत पोहोचतोय आणि गरज भासल्यास जुनं डिझाइन परत आणण्याचाही पर्याय उपलब्ध आहे.